Фотавыстава, якая ламае стэрэатыпы аб людзях, якія жывуць з ВІЧ.

Фотавыстава «Веды аб ВІЧ» пройдзе з 8 па 21 траўня ў Вышэйшым дзяржаўным коледжы сувязі (вул. П. Броўкі, 14)

Мэта фотапраекта: барацьба з дыскрымінацыяй ВІЧ-станоўчых людзей праз інфармаванне насельніцтва.

Адкрыццё пачнецца а 13 гадзіне 8 траўня.

Удзельнікі адкрыцця:

Дзіна Коцікава – аўтар ідэі, фатаграфій і дызайну;

Андрэй Зеневич – рэктар НУ «Вышэйшы дзяржаўны коледж сувязі»;

Кацярына Шарай – администратар праектаў БАА «Пазітыўны рух».

Мерапрыемства прымеркавана да Дня памяці памерлых ад СНІДу, які ў гэтым годзе адзначаецца 20 траўня.

Пасля адкрыцця ўсе ўдзельнікі змогуць атрымаць інфармацыйныя матэрыялы, прысвечаныя тэме ВІЧ/СНІДу (паштоўкі, тэматычныя буклеты), а таксама задаць свае пытанні спецыялістам.

«Веды аб ВІЧ», у адрозненне ад шматлікіх інфармацыйных плакатаў і сацыяльных кампаній, не ўтрымлівае жахлівых вобразаў. Асноўная ідэя фотавыставы – спрыяць змене грамадскіх стэрэатыпаў у адносінах да людзей, якія жывуць з ВІЧ, прадставіць іх як раўнапраўных членаў грамадства. ВІЧ-станоўчыя людзі прадстаўлены тут актыўнымі, адкрытымі. Яны знайшлі ў сабе сілы застацца сабой і, пры гэтым, не проста жыць, але і быць побач і дапамагаць тым, каму гэта трэба. Героі фотавыставы: людзі, якія жывуць з ВІЧ, іх партнёры і дзеці: Святлана, Алена, Дзяніс, Алена, Аляксей і Марыя, Дзяніс і Марыя, Вольга і Яна. Гэта прадстаўнікі сацыяльна значных прафесій, якія ўвасабляюць сабой патаемныя чалавечыя жаданні, эмоцыі і імкненні. Усё тое, што суправаджае чалавека ўсё яго жыццё, тое, у чым ён мае патрэбу: спасцігаць новае, дарыць радасць, кахаць...

Па словах ВІЧ-станоўчых людзей «Веды аб ВІЧ» – гэта вельмі вялікая падтрымка, якая дапамагае жыць і ўставаць на ногі, гледзячы на прыклады іншых.

Фотапраект з'яўляецца часткай інфармацыйна-культурнай кампаніі «Пасланне» ў рамках рэалізацыі гранта Глабальнага фонду для барацьбы са СНІДам, туберкулёзам і малярыяй «Забеспячэнне ўсеагульнага доступу ключавых пацярпелых груп насельніцтва ў Беларусі да прафілактыкі, лячэння і догляду ў сувязі з ВІЧ». Ён ажыццяўляецца Праграмай развіцця ААН у супрацоўніцтве з Міністэрствам аховы здароўя Беларусі пры падтрымцы Аб'яднанай праграмы ААН па ВІЧ/СНІД (ЮНЭЙДС).

Праца выставы арганізавана пры падтрымцы валанцёрскага клуба «Здрава», створанага грамадскім аб'яднаннем «Амрыта» на базе НУ ВДКС у межах праекту «Прафілактыка і лячэнне ВІЧ / СНІДу ў Рэспубліцы Беларусь - 2». Праект ажыццяўляецца Праграмай развіцця ААН у супрацоўніцтве з Міністэрствам аховы здароўя Рэспублікі Беларусь, Міністэрствам адукацыі Рэспублікі Беларусь.

Выстава будзе працаваць з 8 па 21 траўня з 11.00 да 17.00.

Уваход вольны!